Syllad kylla u Gaurav ka Congress ya u Nalin ka BJP

Shillong: Hadien i yakop u heh ka BJP wa pait ya ka Meghalaya, u Nalin S Kohli wow yaleh markhmat wa u Montri Rangbah ka jylla u Dr. Mukul Sangma, u wa ektien ka All India Congress Committee, u Gourav Gogoi uwa man leh u MP na Assam, da mih u chakhmat wow kop yaleh pyrchah ya u Kohli.

Hawa yaklam wa kiwa thoh khubor ynne hei wan u ha Shillong, u Gogoi uwa man leh u khon u Montri Rangbah warim ka Assam u Tarun Gogoi, da ong u wa oo smat u wow pdiang yei kop yaleh u Nalin Kohli hajrong ki kaam ka BJP wa ka Congress ha kani ka thaiñ mihsngi. U Gourav da ong u wa da yoo u ha ki khubor wa u Nalin u da kop u wow yaleh pyrchah ya u Mukul lada u Nalin bien u wow yania markhmat.

Hawa syllad ya ka sorkar NDA wa yahkhmat da u Narendra Modi, u Gourav da ong u wa kani ka sorkar kawa la le snem da em le tylli ki mat wa kongsan hakhmat ki paidbah wei kitæ toh wow “bhah, pynjæd wei wow pynwiar (Divide, Destroy & Destruct)”. Katkam i pynbaad u Gourav, ka sorkar BJP da pynyaphær i sñiaw jaitbru, i sñiaw niam wei ini da yoo da sakhi nei chah dat chah bom ki bru du neidaw ki masi.

Da ong u wa kani ka sorkar NDA toh wow pyrchah yei baam doh masi wei wow dai ya ki wei ini toh na ka aiñ wa chna da ka Congress wei ini i kam ka BJP man i iwa thok ya ki paidbah. Da pynbaad u wa ka mukotduma ha ka Supreme Court toh kawa da leh da kawi ka seiñ kawa yatoh wa ka Maneka Gandhi, ka MP ka BJP. Da beiñ u ya ka sorkar u Narendra Modi toh kawa yada wei sumaar ya ki karkhana, ki heh spah, katwa ym ap ko ya kiwa dooh wa duk.