Kiwa kawang bol da lehbha ki ha ka yalehke ka sngi nyngkong ka Semifinal wa ar ka U-15 Inter District Cricket Tournament 2023 wa pynman da ka Meghalaya Cricket Association hapyrdi ka Tura District Cricket Association waka West Jaiñtia Hills DCA ha Umbuda, Ri-Bhoi ynne ka sngi.
Ka WJH da jop ko ya ka kylla-khlem wei da jied ko wow kawang bol nyngkong heiwa ka Tura da kamai ko 125 (All Out) ha ka Innings wa nyngkong. Ka WJH da jubab ko deiwa yoh 152/10 ha ka Innings wa nyngkong yong ka heiwa ka Tura da jubab ko da 24 khlem dooh Wicket ha ka Innings wa ar deiwa em 3 Run chadien.
U Namewanki Pakyntein da yoh u 5/26 da ka bol ya ka WJH. Katwa na kiwa Bat ka Tura da lehbha u Trijal Agarwal uwa da kamai 28 Run.
Ka WJH da dooh ko 3 Wicket hapoh 10 Over tangwa da wan u Maremdorkini Sutnga yow pynskem yei kamai Run deiwa yoh 54 khlem haap na 86 bol yow pyntam ya ka thong ka TDCA. U Manthan Gupta da lehbha u ya ka Tura da ka bol deiwa yoh 5/36.
Ka Tura da yoh ko wow Bat 5 Over chwa wow kut ka yalehke heiwa u Aritra Paul (15 Not Out) wa u Agatchu Chetai K Marak (9 Not Out) da neh ki hadooh wa kut, heiwa waroh arliang emlaad ki wow jop mynstep ka sngi khaddooh.
Kiwa jop daw yoh ki wow yachem waka Shillong Cricket Association-A kawa da pynrem ya ka East Garo Hills DCA ha ka Semifinal wa da dep pynman ha ka 27 tarik.
