Jowai: Neidaw wa da sdang boon i wan ki baar jylla wow seiñ khih haki chnong waphær waphær ka ri-loom Jaiñtia, neiliang ki ar tylli ki chnat krehkaam ka Jaiñtia Hills Autonomous District Council wa kynthup yaka chnat Taxation wa Political, ynne ka sngi da pynman ki yaka yalang wa ki waheh chnong yong ki chnong waphær waphær wa em ha u sarok bah næ kiwa man ki chnong wa heh kiwa em ki yaw ki haat wa heh wei ya kani ka yalang da pynman ha MDC Hostel, Riatsasiam Jowai wow phyllu yumut yei eh na ini i wan psiah ki baar jylla.
Ha kani ka yalang da emlang u EM In-charge ka chnat Taxation u Winning G Sungoh, u EM In-charge ka chnat Pollitical u Finelyness Bareh nalor ki sahep na kini ki ar tylli ki chnat wa kynthup yaka C. Tyngkan, u A. Ksoo, u B. Mulieh, u H.D. Shylla wa kiwi kiwi.
“Ka JHADC hi toh kawa pait yaka riti dustur, ka khayi pateiñ, tangwa du i bor won leh ym ye wow lai mih cha waroh ki chnong ki thaw, neitæ i daw i khut i yaki waheh chnong wow paan ya i yakrehlang, wei lada em kiwon kiwon ki baar jylla kiwa wan seiñ kaam haki chnong yong ki, toh u thoh wow pyntip cha ka Council khnang wow yoh yukheiñ yei em ki baar jylla ha ki chnong waphær waphær,” da ong u Winning G Sungoh hawa e yei klam.
Da pyntip u leh wa i yachem da man ko kawa mihsoh neidaw wa ki waheh chnong da kular ki wow ya krehlang wei da chim yaka rai wa lada chem yaki dukan wym em Trading License toh wow khang khyrdep yaki wei wow pyntip cha ka Council.
Neitæ won i rukom e Trading License da rai wow pait yaka kaam wa lada toh ki kaam wa ki bru yong i ye ki wow leh ym e bor yaki baar jylla wow seiñ khih ki, katwa yaki kaam wa ym ye ki bru yong i wow leh neibynta i myntoi lang daw e cha ki bar jylla tangwa toh u yoh NOC wa Trading License ki naka JHADC.
Heiyatoh wa ki kaam Benami leh lyngba ki waheh chnong suk bha ki wow tip kiyi wa leh ya kini ki kaam.
Ha kani ka yachem da khut chwa du yaki waheh chnong wa haap haki thaaiñ nongkyndong katwa kiwa haap hapoh ka sor Jowai won daw khut ha kiwi ki por.
Discussion about this post