Ka Liang Pyrchah ha Khasi Hills Autonomous District Council (KHADC) ym pu em rai ko wow sai kyrtong neibynta u jied ya u Chief Executive Member yow chna ya ka Executive Committee wa thymme hadien wa hiar chuki noh u CEM uwa man leh u MDC ka VPP na Lyngkyrdem, u Shemborlang Rynjah.
U Shemborlang Rynjah da e kti u ya ka chithi hiar chuki ynnin ka sngi ha u Chairman ka KHADC, deiwa e daw wym em chait bha u. Da ini wa hiar chuki noh u CEM, ka Executive Committee waroh kawi leh da haap ko wei daw hap wow chna thymme ka hadien wa da jied ya u CEM.
Neiliang uwa yahkhmat ka Liang Pyrchah ha KHADC, u Titosstarwell Chyne da ong u wa ya kattæ ki MDC ka Liang Pyrchah ym pu pyrkhat ki iyi iyi neibynta kani ka kaam wei daw yang chwa yei pynbna u Lat ka jylla wow khut pynman ya ka dorbar kyrpang neibynta u jied ya u CEM.
U Titos da pyntip u leh wa dadep yaklam wa u CEM wa da hiar chuki wei da kitbok u ya oo wow yoh yei doh i phaad wa chait wa khlan.
Kam wow kdaw heini wa hapoh ka yung dorbar wa em 30 ngut ha KHADC, ka Voice of the People Party (VPP) da em ko 18 ngut ki MDC wa kynthup u MDC wa dei thung, katwa ka Liang Pyrchah em ko 12 ngut ki MDC wa kynthup na ka NPP 5 ngut, UDP 5, HSPDP 1 wa uwi u MDC khlem seiñ.
Discussion about this post