Kiwa ha-yung ha-sem u Roning Nongkynrih, da ujor pyrchah ki ya uwi u BSF wa emkti wow siat yap ya u Roning ynnin i miet ka 5 tarik ha ka chnong Mawshun kawa em ha sarok Pynursla-Dawki.
Ki pulit da chim yutip ki na u diah u Roning uwa emlang ha kani ka Truck wei ya ka Case da Register ha Pynursla Police Station wei i takit dang lai i chaphrang.
Neiliang u Erwin Sutnga uwa da synraan lang cha Police Station ya u diah u Roning, da ong u wa lada em i suba, ki BSF toh u pyntip ki cha ki pulit tangwa phylla won ileh wa kini ki BSF da siat ki khlem takit.
U Erwin uwa man leh u muktiar wa pawnaam, da ong u wa em ki kyndon yong ka aiñ hawa da ujor wei ka takit leh toh u lai ko.
Da ong u wa katkam i sakhiat wa da yoo ha ka ujor, pynyoo wa em i lehbor wei ya kani haap hapoh ki kyndon aiñ CrPC wa IPC kawa pait da ki pulit ka jylla, wei ki pulit toh u leh ki yeiwa emkaam.
Da ong u wa ini toh iwi na i leh ki BSF pynyoo ko wa da pynemkaam bakla ya ka suloi wa e da ka sorkar wow yada ya ka ri, deiwa pynrap wa lada em i kylleiñ ya ini i kaam daw booddien u wow pyntikna wa toh u bichaar ya kini ki bru deiwa khor.
