U Lahkmen Rymbui, MLA ka Amlarem Constituency uwa man leh uwa e buit ka sorkar jylla, ynne ka sngi da wai u ya ka yung skur (Building) thymme ka Demthring Wahthang Govt. L.P. School kawa da seiñ nadooh u snem 1973, ya kawa da chna lyngba ka State Mission Education Phase-II yong u snem 2023-2024 ha ka mang poisa wa Rs. 43 lak tam.
Ha kani ka sngi wai ya kani ka yung skur da emlang ki waheh wasian ka chnong nadooh u waheh chnong, u E. Ryngkhlem, u P.M. Ryngkhlem, u S.B. Ryngkhlem, u L.C. Ryngkhlem, ki paaid wa chong chnong, kiwa sikai, ki khynnah skur wa kiwi.
U Lahkmen Rymbui hawa e yei klam ong u i stat i tip toh iwa emkaam hadooh kattæ kattæ, wei dei ya krehlang ye u poi cha ka thong i jop neibynta u kyntu kynrong yei puræ puthi.
Kam uwa mihkhmat ong u katwa ye wa lah pyrchang u wow chimkhia yei kaam, wei i yoh ya kani ka Building thymme leh toh deiwa chimkhia ka sorkar kawa em i kitkhlieh. Heijooh i por yaroh u ya u Montri Rangbah uwa da pyrchang u kreh ki kaam wa bha na ki snem cha ki snem.
“Ki bru ye ki u beiñ u kynnoh tangwa kani ka sorkar toh kawa chimkhia u paitbniah yei ku i puræ puthi ha ka liang waphær waphær wa kynthup leh hei wow chna ki yung skur,” ong u Lahkmen Rymbui.
Khana haroh u kamwa man kattæ angnood u wow pynku kyrdan ya ka RMSA Shkenpyrsit Secondary School kamjooh ka RMSA ha chnong Mustem cha ka Higher Secondary School. Ini toh i lai luti yong oo kam uwa mihkhmat kammon u thooh laad yei emkaam ki chnong ki thaw.
Kamtæ hawa paan i kyrchaan i yakrehlang neibynta iwon iwon i kaam wa bha, pyn-eh-daw haroh u ya kiwa yahkhmat ka chnong Demthring, kiwa sikai, ki khynnah skur yow ye u kyntu kynrong chooh choh ki ya kani ka skur neipor cheipor.
Ha kani ka jooh ka sngi ha ka yalang wa pynlai da u M.S.Ryngkhlem, ka School Managing Committee da pynkup burom haroh ko ya ka Nila Dhar kawa da chong-ngiah kam kawa sikai ha kani ka skur.
Discussion about this post