Ka UK India Business Council (UKIBC) da yachem ko wa u James Sangma, uwa man leh kam u Montri wa pait ya ki aiñ wa ki dan hapoh ka jylla yow yaklam wa oo chaphang ka Online Gaming waka Sports Betting hapoh Meghalaya kamjooh yow pynlait ya ka bui (Report) UKIBC Industry Report: Gaming for Growth- India’s Sports and Gaming Market Potential.
Ka UKIBC da ong ko wa ka Meghalaya toh kawa pdiang bha ya kiwa boon ki jaityalehke ha nujor wa kiwi ki jylla hapoh India heiwa da pynman aiñ yow chah yei siat tim, yei thoh tim heiwa deiwa kheiñ ya ki 7 tylli ki jait kaam wa chah wow pynman yathong (Lottery, Horse Racing, Sports Betting, Poker, Rummy, Casino wa Fantasy Sports) ka Meghalaya da yoh ko 92.85 naka 100 iwa mut wa da em ki aiñ neibynta wow leh ya kini.
Ka UKIBC da ong wa kini waroh daw ye ko wow pynyoh khih yoh kreh ya kiwa boon, daw wanrah ko leh ya ka Foreign Direct Investment (FDI) kamjooh leh daw khang ko yei leh tooh, leh rieh ki bru ya kini ki kaam iwa daw pynyoh dan leh ya ka sorkar.
Kam wow pynkynmoo wa ini wa dep ka sorkar da wanrah ko ka aiñ heiyatoh wa ki Online Gaming wei ha India kini ki jait da yabhah ya ki ha ki ar bynta “Games of Skill’ waka ‘Game of Chance’ iwa mut em ki yalehke wa emkaam i sap yow jop katwa kiwi won chong ha ka bhah ka nasib.
Ha jylla da pynkrehkaam ya ka aiñ Meghalaya Regulation of Gaming Act, 2021 heiwa emkaam wow yoh License yow ye pynman ya ki jait yakob wa ki yathong, ki yakhle.
Neiliang u Kevin McCole, UKIBC Managing Director da yaroh u ya i stat ka sorkar Meghalaya u pyrkhat yow ye u pynmih poisa kamjooh yow yoh kreh ki bru. Heiwa ha India em boon ki jait yalehke ki wym pu em haap hapoh kawon kawon ka aiñ wei emkaam wow yada yow lait ki u poi cha iwa lait.
Da kdaw u leh wa ka dan wa da kheiñ ha kini ki jait yalehke ha pyrthai da poi ko hadooh 28% kawa man leh kawi na ki dan wa heh dooh hapoh pyrthai iwa daw ye u pynyoh nong bha ya ka sorkar.
Da khana u leh wa ha u snem 2021 da em 433 Million ngut kiwa leh Gaming hapoh India wei da antaad wa ha u snem 2025 daw ku ini chadooh 657 Million ngut deiwa pynemkaam da ki Smart Phone iwa daw pynku yei yoh nong na T. 136 Billion ha u snem mang tangka 2021 cha ka T. 290 Billion ha u snem mang tangka iwa man wa ku da palat 100% ha ki soo snem.
Puræ leh: Mynjur ka sorkar Meghalaya ya ki kyndon aiñ yow yoh dan naka Online Gaming
Puræ leh: Pynkrehkaam ka sorkar ya ki kyndon aiñ wow yoh dan na ki kaam yakhle
