Wow krehkaam noh ka ILP rai ka EC ka KHADC wow kyntu ya u Lat wow pynkrehkaam ya ka Bengal Eastern Frontier Regulation, 1873

Shillong: Ka Executive Committee (EC) ka Khasi Hills Autonomous District Council (KHADC) kawa da chong ynne ka sngi da rai ko wow kyntu ya u Lat ka jylla wow pynbna paidbah (Notify) noh ya i pynkrehkaam ya ka Bengal Eastern Frontier Regulation 1873 wei lada ye u pynkrehkaam ya ka mut i wa da pynkrehkaam noh ya ka Inner Line Permit (ILP).

U HS Shylla uwa man u Chief Executive Member (CEM) ka KHADC hadien wa da kut ka yalang da ong u wa ki rai wa da chim, kynthup ki ya ka Village Town Police yong u snem 1991 heipor wa u Hoping man u kam u CEM tangwa da pynuiñ noh ka sorkar ya ka.

“Hawa wyrchaw ya ka Village and Town Police yong ka Jaiñtia Hills yaphær ki kajiak wei haap pynbait ya ki wei daw phah biang i cha ka sorkar khnang wow pdiang ko ya kani ka Village and Town Police ka KHADC,” da ong u Shylla.

U Shylla da ong u wa jhan wow em kani ka Village and Town Police neibhah da yoh ya ka chithi ha ka 19 Naitung 2017 na u W Rapthap, Under Secretary ka sorkar Meghalaya heiwa da thoh cha ki le tylli ki District Council heiwa da pyndait ya ka dorkhat na ka HYC cha ka sorkar jylla ha ka 30 Wisu 2017  kawa da pdiang da u Under Secretary ka sorkar jylla lyngba ka tnat Political Department.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Ha kani ka dorkhat na ka HYC da dawa ya ka Inner Line Permit (ILP), wei neiliang ka sorkar da phah ko cha ka District Council wei kani ka file da sah ko da rap slem kattu.

“Ini da pynbor i wow kyruiñ cha ka Adaptation Laws yong u snem 1952 ka United Khasi Jaiñtia Hills District (Application of law 1952) kawa u Lat da ekti u wei da soi da u President ka Ri India u Rajendra Prasad ha ka 3 tarik u Naisan 1952,” da ong u Shylla.

Neidaw wa kini ki aiñ da pynbna paidbah (Notified) ya ki kamwa man kiwi ki aiñ ka sorkar pyrdi kiwa kreh hapoh u pood u ang ka KHADC wei ha kitu ki por toh ka United Khasi Jaiñtia Hills wei da wanrah leh ya ka Bengal Eastern Frontier Regulation 1873.

U CEM da pyntip u wa ka EC ynne ka sngi hapoh da rai ko wow khut ha ka dorbar wa kyrpang wei wow kyntu ya u Lat ka jylla wow pynbna paidbah (Notify) yei pynkrehkaam ya ka Bengal Eastern Frontier Regulation 1873.

Da ong u wa waroh chi kattu da ieh hi-eh kamtu donhi tangwa manda tih tre wei ngam yillu ya ka ILP chong i ha ki Autonomous District Council (ADC) wa ka ri-loom Jaiñtia leh haap ko heijooh.

U Shylla da ong u wa ki jylla kiwa pynkrehkaam ya ka Bengal Eastern Frontier Regulation 1873, toh ka jylla Nagaland wa Mizoram wei heini kreh ka ILP kamtæ da kyntu ya ka GHADC wow bood yeini i jooh.