Jowai: Ynne kam chi bynta wow pynsñiawthooh ya ka thong krehkaam ka BJP West Jaiñtia Hills da pynman ko ya ka yalang wow leh warom ya ka thong krehkaam wa sdang ka sorkar wa tip kam ka “Sankalp Se Siddhi” namo wow raikut wow pynman ya ka ri India wa thymme.
Kani ka thong krehkaam toh wow wanrah yei synchaar iwa khooid iwa khlem baam-tooh, i ya tylli, i roi i paar, wa kiwi kiwi khnang wow pynman ya ka ri kawa yakynjoh kyrdan wa kiwi ki ri ka India.
Ha kani ka yalang u Montri Khynnah ka sorkar pyrdi uwa pait ya ka tnat Railways u Rajen Gohain da man u kam u kongsan.
Ya kani ka yalang da pyllai da u President ka seiñ ha West Jaiñtia Hills District, u Marki Mulieh, wei da yoh i klam pdiang burom na u Secretary ka seiñ ha ka District u Teibor Hinge.
Da yoh leh yei klam na u National Executive Member, Schedule Tribe Morcha ka seiñ u Sing Mulieh uwa da batai chaphang kani ka thong wa tip leh kam ka New India Movement.
U Vice President ka BJP-Megjalaya u J.A. Lyngdoh hei klam da pynkynmoo u ya u snem 1942 heiwa kiwa yaleh laitlooid ya ka ri da rai kut ki wow kreh hajrong ka thong ‘Quit India Movement’ wei kamtæ da laitlooid ka ri hadien san snem itæ ha u 1947. Wei kani hi ka New India Movement da sdang ha uni u snem wow wanrah ya i kylla ya ka ri waroh kawi wei ha waroh ki liang pyn ha u snem 2022.
Da pynkynmoo u leh ya u snem 1998 heiwa da mih 7 yuspong na ka jooh ka party du na ri-loom Jaiñtia wei yooluti u wa ha uni u 2018 leh u mih ki 7 MLA na kawi hi ka party (kawa man ka BJP).
U Rajen Gohain hachwa wow e yei klam da yahkhmat u wow chim ya ki kyntien kular wow yakreh neibynta ka ri, pyrchah ya ki kaam baam-tooh, ki kaam kieñ suloi, wow kyntu kynrong yei rep i riang, wa kiwi kiwi ki kaam neibynta ka ri.
Da khana u yei daw wa kwah u Montri Rangbahdooh ka ri u Narendra Modi da sdang u ya kani ka thong wow wanrah ya ka India wa thymme.
Heijooh i por da klam u leh chaphang ki kaam ka sorkar pyrdi nadooh ki kaam pynroi, ki kaam pyrchah ya ki seiñ kieñ suloi, wa kiwi kiwi kiwa da sdang wei da leh hapoh i yahkhmat u Narendra Modi.
Da pynkut ya ka yalang da ka ki kyntien e khublei na u General Secretary ka BJP-WJHD u L.J. Damekit Paswet.
Ynne ka sngi chwa wow sdang kani ka yalang da hiar chwa cha Madiah Kmaiblai, Syntu Ksiar wow booh syntu kam ka dak wow kynmoo warom ya u Woh Kiang Nangbah ha u mot sahnaam yong oo.
Heijooh i por heipor wa booh ya u syntu kynmoowarom da jia ryngkhat wa toh i por wow sdang ka siat tim ha kani ka madan, kamtæ u Gohain wa u Lyngdoh leh da chim ki ya ka laad wow siat ya ka thong ha kani ka thaw.
Discussion about this post