U National Vice President ka National People’s Party (NPP), u Prestone Tynsong da ong u wa i yaklam ka NPP wow emlang ha ka sorkar waka BJP ha Manipur dang lai i, wei neiliang ka NPP hapoh i yahkhmat yong u President, u Conrad K Sangma daw yaklam u ya ini i kaam wa ki heh ka BJP cha Delhi hadien wa da kut ka dorbar mang tangka yong ka jylla.
Kam wow pynkynmoo wa ha ka Election wa dang dep ha Manipur, ka NPP da jop ko 7 ngut ki MLA, katwa ka BJP da jop ko hadooh 32 ngut na ki 60 tylli ki Constituency ha ka jylla Manipur, wei neiliang ka BJP da kyntait ko wow kynthup lang yaka NPP ha ka sorkar wa thymme, hanla haka sorkar warim da ya krehlang waka BJP hapoh katai ka jylla.
Hawa kylli ynne ka sngi, u Prestone da ong u wa ka NPP da yooluti ko wow jop palat 10 ngut ha ka Election ha Manipur, tangwa da yoh du 7 ngut ki MLA, tangwa da ong u wa hanla ka Party jop ko du 7 ngut, ka Party da khlan ko ha katai ka jylla neibhah ha ki 15 tylli ki Constituency ki kyrtong ka NPP da chah rem ki du da kamwa 300 Vote.
Hawa kylli chooh chooh, da ong u wa u President ka Party daw yaklam biang u cha Delhi neibynta wow spaaiñ lang ya ka NPP ha ka sorkar yong ka BJP ha Manipur.
Neiliang ka NPP, Manipur da dep ko leh wow jied ya u N. Kayisii kam uwa yahkhmat ka NPP Legislative Party.
Ka Party ha kani ka Election da pynyieñ ko waroh 38 ngut ki kyrtong heiwa u Kayisii da jop u na Rabudi deiwa yoh 21,601 Vote pyrchah ya u M Francis Ngajokpa ka Naga People’s Front uwa da yoh 21,025 Vote.
