Shillong: I yatai hajrong i pynbaad yong ki baar jylla wa em i chah ban beiñ ya kiwi ki jaitbru, khamtam ya ki Bengali kiwa sah ha ka thaaiñ Ichamati wa Majai kamwa da ujor da ki 3 ngut ki baar jylla, da poi hapoh ka yung dorbar yong ka Khasi Hills Autonomous District Council (KHADC). Ini i phang da mih ha i por wa wanrah u Bindo M Lanong ya ka phang (Motion) wa yatoh wa i yoh psiah ki baar jylla kawa da wanrah yei maa ya ka jaitbru.
U Bindo da ong u wa kam ki dkhot kiwa em i kitkhlieh ya ki kaam wa yatoh wa ka jaitbru, da sñiawkhia u ya ki kaam yong ka jaitbru wa da rah chadooh cha baar leh, heiwa u Lat warim ka jylla da pynpoi u ya ini cha Kolkata wow paan kyrchan neibynta i pynyap bru. Da ong u wa ki maa kiwa chyrkhei kiwa yang ya ka jaitbru katni deiwa ong wa katkam i lum yutip ka sorkar, ka jylla ka em ko 34 lak ngut kiwa chong chnong, wei na kini, kamwa 3.42 lak toh ki Hindu, kamwa 1.30 lak ki Muslim, ki Christan kamwa 22 lak, ki Sikh 32 hajar, katwa kiwi kiwi man ki kamwa 2.58 lak ngut.
Hawa chimbynta ha ka yatai, u MDC ka Mairang, u Batskhem Ryntathiang da ong u wa i wan yong ki baar jylla toh wow kamai tangwa katni da sdang sñiaw heh ki, da khroo bor ki, da sdang ki wow pynyoo, tangwa lada khyrrup noh hi ya ki kaam ki baar jylla daw hap ki wow yut noh.
U MDC ka Nongkrem, u Lambor Malngiang da ong u, kiwa jia ha kini ki sngi da che kdar, neibhah da thmu ha kini ki sngi Puja wow pynmih kulmar khnang wow yoh u ujor cha ka sorkar India yow phah synchaar President, da pynsñiaw u yei pyrchah wa em ki baar jylla kiwa da pynbaad wa ki Khasi ki toh ki nong Mongolia.
U MDC ka Shella, u Teinwell Dkhar da ong u wa ini i phang da ktah bha ko rap boon ha ki thaaiñ khappood wa da mihkhmat u. Da ong u wa kiwa pynyap ya u Lurshai Hynniewta da em pyrtuid ki 40 ngut tangwa da kem ya du 17 ngut, iwa da mih ki phang kylli cheiwon wiar kiwi. Hawa yatoh wa ki 3 ngut ki baar jylla kiwa da lai ujor cha u Lat, u CEM warim da ong u wa da lai pait u cha katai ka thaaiñ wei da kylli leh chaphang kita ki baar jylla, tangwa boon kiwa chong chnong da pynsñiaw ki wa ym tipmit ki ya ki.
Hawa pynche ya ki luti ka KHADC, u Titosstarwell Chyne uwa man u CEM da ong u wa ka Council da thung ko ya ka Special Committee wow puræ bniah ya ka chithi khnang wow yoh u e yaka jubab kawa biang.
