Ka Supreme Court ynne da kyntait ko u pyndam ya ka jamin wa da yoh ka Sonam Raghuvanshi kawa man kawi na kiwa suba emkti wow pynyap ya u kurim ko, u Raja Raghuvanshi iwa da jia ha u Naisan 2025 ha thaaiñ Sohra.
Chwa ini ha kani hi ka tayaaw, ka High Court leh ym bien ko wow pyndam ya ka jamin wa da yoh ka Sonam kawa da e chwa ka yung bichaar ka Addl. DC ka East Khasi Hills ha u bnai April uni u snem.
Neiliang u Solicitor General of India, u Tushar Mehta uwa mihkhmat ya ka Meghalaya da yasaaid u deiwa ong wa kani ka yoh jamin toh kawa khyrngiat bha neibhah ka Sonam deilang wa le ngut kiwi da pynyap ki ya u Raja dep tæ noh ki yei metyap u chapoh synrang hadien wa dep ki wow dat pynmynsoo oo wei hadien ini da yut ko wei da kem ya ka na Uttar Pradesh.
Da ong u leh wa ka yung bichaar wa e jamin ya ka Sonam da kdaw ko yeiwa ym em leh yeiwa toh u leh heipor wa kem du neidaw wa bakla u thoh ha ka kot deiwa pynemkaam da ka kyndon wa bakla tangwa u Magistrate wa e ya ka Transit Warrant yow kit ya ka Sonam na Uttar Pradesh da chem u wa biang hi waroh i jait hawa kem ya ka wei hawa yaleh jamin nyngkong won ka Sonam ha Shillong, ka jooh ka Judge da kyntait ko wow e jamin tangwa hei sien wa ar won da e jamin ko deiwa ong wa ki pulit da thoh bakla ya ka Section 403(1) BNS heithaw u thoh 103(1) BNS (Punishment for Murder) wei ym em leh kam katæ ka Section 403 ha ka BNS.
U Solicitor General da e nongmuna u leh ya kawi ka mukotduma heiwa ka yung bichaar maap hi ko yeiwa bakla u thoh.
Ka Supreme Court da ong ko wa hanla da yoh jamin ka Sonam, ym ye wow khang ya ki pulit wow kem ka deiwi.
Neiliang u muktiar ka Sonam da pynche u hakhmat ka yung bichaar wa ki kyndon ka jamin toh wa ka Sonam hap ko wow neh bait ha Shillong wei i bichaar ya ka mukotduma toh kawa da lai bait wei ym emkaam de wow kset ka.
Ka Supreme Court da ong ko wa hawa da pynlait ka wei ymtoh de kawa dang em ha kti ki pulit, ym sñiaw emkaam de wow pyndam yei yoh jamin.
Discussion about this post