U Symbood Montri Rangbah wa pait ya ka chnat kaam pohyung (Police), u Prestone Tynsong da pyntikna u wa ka sorkar daw leh ko deiwa eh ya kiwa wan buhai chnong pyrchah ya ka aiñ hapoh ka jylla.
U Prestone da pyntip u leh wa ka sorkar jylla da khut ko ya ka yalang wow pyrkhat hajrong ini i kaam khamtam hadien wa ka sorkar Assam da khyndang ko ya ki bru kiwa da chah pynbaad wa wan chong chnong ki pyrchah ya ka aiñ ha katai ka jylla.
Hawa klam wa kiwa thoh khubor, u Prestone da khana u wa ka sorkar da phah ko ya ka Director General of Police (DGP) wa ya waroh ki bor District deilang ki Superintendent of Police (SP) wow paitbhniah bha ki wei wow booddien yei wan psiah kiwon kiwon ki bru chapoh ka jylla.
“Hadooh kattæ ka sorkar ym pu yoh ko ya kawon kawon ka bui (Report) wa chem yei wan buhai chnong pyrchah aiñ ki bru kiwa da chah beh na kiwi ki jylla næ na kiwi ki ri wa marjan chapoh Meghalaya,” da ong u Prestone.
Hawa yatoh wa i yaklam pynbait pood hapyrdi ka Meghalaya wa Assam, u Prestone da pyntip u wa ka sorkar Meghalaya kattæ dang yang ko yei jubab na ka sorkar Assam hawa yatoh wa i pynbait tarik wow sdang biang yei yaklam pood.
Da pyntip u leh wa ka Meghalaya dadep phah ko yei kyrpaad neibynta ka tarik wow yachemlang waroh ki Regional Committee yong waroh ar tylli ki jylla.
Discussion about this post