Ka Dakahi Kyndait kawa na chnong Mukhaialong, East Jaiñtia Hills District sa chisien da wanrah naam ko ya ka jylla Meghalaya deiwa yoh nyngkong na ki kynthai ha ka World Championship 100K Ladakh -Trail to Heaven kawa da pynman ha ka 6 wa 8 tarik uni u bnai.
Ini iwa jop ka Dakahi toh i yaphet pyllah wa 100 Km heiwa da jop ko leh $500 ka song poisa.
Kani ka yakob toh kawa pynman ha Leh-Stok Markha Valley ka Ladakh ha ki bynta wa jrong bha na sla duriaw heiwa ka Ladakh ha kiwa boon ki thaw em ko 3,500 m wei ha ki bynta wa rap chajrong wa hap yaphet ha kani ka yakob em kiwa dapoi 5,000 m.
I daw wa khut ka kam ka World Championship neidaw wa ka Ladakh man ko kawi na ki le tylli ki thaw wa pynman ya kani ka yakob, kitæ ka Costa Rica 200, ka Ladakh Trail wa ka Cro Trail. Wei i pyrtuid wa pura toh ka One Hundred Ultra Endurance Trail World Championship.
Ha kawa chimbynta ka Dakahi ka 100K ha uni u snem da em 30 ngut kiwa da chibynta wei ka luti jngai ko 111.41 Km heiwa nadooh wa sdang i ku dapoi i 4,633m wei yow pyndep yeini da booh por 30 kynta.
I duna kiwa chibynta toh neidaw kani ka yaphet man ko kawi na kiwa khor dooh ha pyrthai wa ye du ki kattu katni wow phet.
Discussion about this post