ka sorkar Meghalaya lyngba ka Transport Department ynne da sdang ko ya ka One-Time Settlement (OTS) Scheme hajrong ka thong wow pynsuk ya ki tre kari kamai wow pynjem ya ka dan wa dang sah kamjooh kiwi ki kuna.
Ya kani ka Scheme da sdang da u Sniawbhalang Dhar uwa man u Deputy Chief Minister kamjooh u Minister ka Transport Department ha ka yalang wa pynman ha Main Secretariat Building, Shillong.
Hawa e i klam, i Sniawbhalang da ong u wa ka OTS Scheme toh kawa pdiang da ka State Cabinet wow pynchlur ya ki tre kari wow su pyndep ya ka poisa wa sah wei lyngba yong ka ki kari kamai ye ki u chah maap hadooh 80% lyngba ka Motor Vehicle Tax, Goods and Passenger Tax wa hadooh 90% u maap neibynta ka Fitness Certificate.
Da ong u wa waroh ka poisa wa sah khlem kheiñ nadooh uwon u snem wa dam u su heiwa ye ki u pynemkaam noh ha kani ka Scheme katkam i kheiñsap namo ka Formula wa booh ka sorkar.
Katkam ka yukheiñ ka chnat, ka poisa wa sah poi ko hadooh kamwa Rs. 1,100 klur wa kynthup ya kamwa Rs. 900 klur kawa man ka kuna Fitness Certificate. Ka Transport Department da antaad ko leh wa lada ki tre kari chim kabu ki na ka Scheme wow su dep ya ka poisa, ka sorkar ye ko wow yoh hadooh kamwa Rs. 180–200 klur.
Ka yukheiñ wa da wanrah ha ka Cabinet da em palat 65,000 tylli ki kari wa sah poisa hapoh ka Motor Vehicle Tax, neitæ 12,642 tylli ki kari wa sah poisa ka Goods and Passenger Tax, wa palat 57,000 won wa sah ka dan Fitness Certificate.
Ka OTS Scheme u krehkaam ko hadooh 31 tarik u August 2026 heiwa u Sniawbhalang da kyntu u ya ki tre ki kari kamai wow chimkabu ya ka nadooh ki kari khian, truck wa kiwi.
Da ong u leh wa hadien wa kut ka Scheme, ki tre kari hap su ki kamwa jooh man ka chipawa snem næ man-u-bnai weiwa ka sorkar ymye ko wow wanrah ya kam kani ka scheme man-u-snem.
Heiyatoh won wa ka Vehicle Scrappage Policy, da ong u wa ka sorkar dang pynkhreh ko yeini wei daw wanrah ya ka Policy mar dep i kaam.
Discussion about this post