Ynne i step synyaaw heipor kamwa 1:30 haroh, da chem wa em kiwa thang Tyre hapyrdi sarok ha ka thaaiñ Mawblei, heiwa hajan i diñ da em ka kot rben wa pynyieñ deilang ki kyntien wa thoh wa ong “Wat kem kulmar ioh kan pluh”.
Hadien kattu katni por ki pulit ka Madanrting Police Station dapoi ki cha katai ka thaw yow tympleh yei diñ wei ka takit dang lai ko.
Hanla ym tip che ini maham mut i ya kiyi, tangwa ha kini ki sngi ki tayaaw wa dep da em i kem ya kiwa yahkhmat ka KSU hajrong i thut i suk i saaiñ hadien ka Bike Rally wa da pynman ha ka 19 tarik u Naisaphra.
Neiliang ka KSU lyngba ka Central Executive Committee (CEC), ynnin ka sngi da e por ko 3 sngi yow kem ya waroh kiwa emkti wow leh pynsih ya ki kari, wow tih sarok pyrchah aiñ wei wow thombor ya ki paidbah kiwa thmu wow lai pynsñiaw yei pyrchah ha ka Public Hearing yong ka Shree Cement kawa da pynman ha ka 31 tarik u Naiynñiaw ha Lum Syrman, East Jaiñtia Hills.
Ka KSU da pynsñiaw ko leh yei chrai hajrong i chah pyngngat kyndon wei chah pyntoh Case kiwa yahkhmat ka seiñ awjan man-ka-sngi heiwa da kem leh sa ya uwi u dkhot ka seiñ, u Samuel Kharbani uwa man u General Secretary ka KSU Shillong Mihngi Circle, heipor wa lai u cha i chah khut hajir ki pulit.
Discussion about this post