15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1

Da dep takit ya uwa chah dat ha Golflink: SP

Advertisement ad1
Advertisement ad1
Advertisement ad1

U Superintendent of Police ka East Khasi Hills, u Sylvester Nongtnger da pyntip u wa ha ka 27 tarik uni u bnai, ki pulit da dep ki wow takit ya u Thrangshisha Thongni uwa man uwi na ki khynroo wa chah dat lang ha i janmiet ka 21 tarik ha Golflink, Shillong.

Kam wow kynmmo wa u Thrangshisha ha wa yaklam wa kiwa thoh khubor ynnin ka sngi Bibar da ong u wa ym em wan takit ki næ kylli ki pulit na oo hajrong i jia iwa da wanrah ya i khlaad noh yong u paralok u u Pherlangroy Myrthong.

Neiliang u SP da ong u wa ka takit ym toh kawa da slem neibhah wa hadooh 26 tarik, utai u khynroo toh uwa da chah sumaar ha ICU, wei mar ya yoh yutip wa da mih u na Hospital neiliang ki pulit da lai takit ya oo ha i thaw sah u.

Da ong u wa ki pulit nadooh ka sngi wa nyngkong wa yoh ya i ujor, da pynman ki ya ka takit kawa khlem chong ngiah, heiwa da pyntip u leh wa da thung kyrpang ya ka Special Investigation Team (SIT) kawa khlieh da u SP (City), u Vivek Syiem wow pynsmat yaka takit yow chem ya ki damok wa emkti.

U Nongtnger da ong u wa kani ka takit man ko kawa eh neibhah wa hadooh katni kiwa sakhi kiwa emlang ha itai i jia, ym ye wow tipmit næ batai ya ki bru kiwa emkti, wot hadien wa ki pulit da takit la arsien.

Hawa kylli hajrong i ong wa itai i jia ym toh de neidaw wa yaphær jaitbru, u SP da pyntip u wa hadien wa da takit na ki khynroo wa sakhi ya itai i jia, ym em ong ki wa toh ki baar jylla lane na kiwi won ki jaitbru kiwa emkti, tangwa da ong u wa neiliang ki pulit dang pynsakhiat ki yow chem ya kiwa emkti, deiwa pynrap wa ki bru wa na baar ym nood ki wow chong miet ha Golflink kawa rap hajan na u sarok.

Hawa kylli chooh chooh, u SP da pyntip u wa katkam ka kyndon hapoh ka CrPC, da e por 3 bnai ya ka SIT wow pyndep ya ka takit, wei da pynsñiaw u yei kyrmen wa ki pulit daw ye ki wow kem ya ki damok hachwa wa da booh por.

Ha iwi i liang u heh pulit ka District da kyntu u ya kiwa chong chnong wa ym toh u mutdur næ tharai wa i jia yachoh toh nei yaphær jaitbru khlem da pynsakhiat chwa deilang wa ki sakhi, wei da pynsñiaw u yei kyrmen wa ki pulit daw chem ki yeiwa sakhiat hadien i takit wa bniah.

Share this:
Previous

Da pynman ya i pynyoo rong ya ki dur yongrim ka jylla wa ka Behdieñkhlam ha Jowai

Next

Dawa ka KSU waka LYWA wow kem smat ya kiwa emkti ha iwa jia ha Golflink