Ka North East Adventist University (NEAU) Khliehtyrshi, West Jaiñtia Hills ha ka 25 tarik uni u bnai da pyndep ko ya ka 4th Convocation Ceremony namo u moomær i lai luti kani ka chlem puræ, deiwa pynkup burom ya ki khynroo khyllood wa puræ ha kani ka University wa kynthup nadooh kiwa pyndep Graduate 172 ngut kiwa da yoh Degree wa kiwa yoh Diploma. 89 ngut toh ki Undergraduates haka B.A., B.Sc., B.Sc. MLT, BPT, B.Sc. Nursing, B.Com wa BBA. Da em 76 ngut ki Postgraduate haka M.A. Programme wa 7 ngut ki Diploma haka Medical Laboratory Technology (DMLT).
Ha kani ka sngi pynkup burom, u Symbood Montri Rangbah ka sorkar jylla, u Sniawbhalang Dhar da wan emlang u kam u kongsan, hei emlang u Ch. John Victor, Chancellor, NEAU, u Dr. Paul Bhaggien, Vice Chancellor, u Prof. (Dr.) Anil Kumar Chillimuntha, President & CEO, METAS Group of Institutions (Sponsor), u Dr. R.N. Prabhu Das, Education Director, Southern Asia Division of SDA, ki manbei manpa wa kiwi.
Hadien i klam pdiang wa da yoh na u Vice Chancellor Dr. Paul Bhaggien, neiliang u Chancellor’s Ch. John Victor da e mynsien u ya kiwa da Pass wow yakhun ki yei eh dei chlur mynsien wei deiwa em i ngait.
Da pynkynmoo u leh yei kyntien u Dr. A.P.J. Abdul Kalam, deiwa kyntu u wow em i yoo jngai ya ka mynried, u man kiwa kreh chitom neibynta ka thong, wei u sñiaw kordor leh ya kiwa sikai hei lai luti.
Neiliang u kongsan u Sniawbhalang Dhar, kam uwa jooh puræ ha kani ka chlem e sikai ha u snem 1991, da e mynsien u ya kiwa da Pass deiwa e nongmuna leh yei lai luti yong oo hi. Neitæ da ban u leh hajrong i emkaam u man kiwa chaniah ya idæ, u em i mynsien raikut kawa man ka luti u poi cha ka thong i jop.
Da pynsñiaw haroh u ya ki laad wa da leh ka sorkar jylla kam ka CM-ELEVATE, ka CM-INSPIRE neibynta u yarap ya ki khynroo khyllood wa lai puræ wa em thong u yakhun yei kyrdan kreh wa rap chakhlieh wa kynthup kam ka Civil Service.
Hawa kyntu u wow em yei rukom pyrkhat wa bha, pynkynmoo haroh u ya ki khynroo khyllood wa waroh hi u man i kitæ kiwa yahkhmat.
U Sanswrang Basumatry, President yong kiwa pure u snem 2025, da e khublei sñiawngooh u ya ki bei ki pa, ya ki khynroo khyllood wa da pyndep yei puræ hajrong i embynta ki u synniang cha ka imlang sahlang.
Yei bynta saam Certificate pynkup burom ya ki khynroo khyllood da pynlai da u Dr. Andrew Zimik, Registrar, katwa ka Dr. Lalrenga Colney, Controller of Examinations da pynkup burom ko ya ki 7 ngut ki Gold Medallists kiwa yoh 80% chaneiñ.
Neiliang kiwa Pass yong u snem 2025 da e kti ki leh i e sñiawbha cha ka University wei da pynpsiah dkhot leh ya ki hapoh ka ATS Alumni Association da u Dr. L.F. Lyngdoh, President yong ka Association.
Ya ka dorkhat paan yarap neibynta kiwi won i emkaam kani ka University da e kti ha u kongsan da ka Dr. Jemima M. Marak, Liaison & Development Officer, lyngba u Vice Chancellor.
Da pynkut ya ka yalang pynkup burom da i kyntien kyntu kyrsu na u Dr. Zimik, Registrar, uwa da kyntu ya kiwa da Pass wow pteiñ ki u man kam itæ iwa che ha ka pyrthai.
Discussion about this post